Beðið er svara frá Sigríði Júlíu Brynleifsdóttur, bæjarstjóra um drónaflugið sem tilkynnt var í síðustu viku til lögreglunnar á Vestfjörðum.
Sigríður var innt eftir því hvort það hafi beinst að því að fylgjast með starfsfólki bæjarskrifstofunnar og ef svo væri hvernig hún hyggist bregðast við því.
Lögreglan á Vestfjörðum segir frá því í yfirliti sínu um störf sín í síðustu viku að á föstudaginn hafi lögreglan fengið tilkynningu um einstakling sem væri að fljúga dróna nærri opinberri byggingu. „Rætt var við einstaklinginn og honum gert að láta af háttseminni“ segir lögreglan.
Bragi Axelsson, lögmaður á Ísafirði hefur staðfest að hafa verið að verki en segist hafa verið að taka landslagsmyndir og að lögreglan hafi ekkert óeðlilegt séð við það. Bragi segir „með ólíkindum að ákveðnir starfsmenn í Stjórnsýsluhúsinu skuli láta svona.“
Eiginkona Braga er Bryndís Ósk Jónsdóttir bæjarritari og staðgengill bæjarstjóra.
Samgöngustofa greinir frá því að nýjar reglur Evrópusambandsins um flug ómannaðra loftfara (dróna) hafi tekið gildi og eru nú einnig komnar til framkvæmda hér á Íslandi. Reglugerð 1360/2024 innleiðir reglugerðir ESB 2019/947 og 2019/945 með breytingum.
Þar eru settar takmarkanir á flugi ómannaðra loftfara. Meðal þeirra eru að „óheimilt er að fljúga ómönnuðum loftförum innan 150 metra frá viðkvæmum stöðum, svo sem orkuverum, tengivirkjum, Alþingi, forsetabústað, ráðuneytum, sendiráðum, lögreglustöðvum, fangelsum og sjúkrahúsum, nema með heimild eigenda eða umráðenda.“ og einnig segir að um „flug í grennd við íbúðarhúsnæði eða þar sem fólk dvelur gilda reglur um vernd eignarréttar, friðhelgi einkalífs og persónuvernd.“
