Ný Sóknaráætlun Vestfjarða 2025-2029 hefur verið samþykkt af stjórn Vestfjarðastofu og Fjórðungssambands Vestfirðinga.
Sóknaráætlunin er byggðaáætlun fyrir Vestfirði sem byggir á mati íbúa svæðisins á því hvernig svæðið eigi að þróast næstu fimm ár og felur í sér stöðumat, framtíðarsýn og markmið. Landshlutasamtök sveitarfélaganna sjá um umsýslu og framkvæmd sóknaráætlana í hverjum landshluta en fjárveitingar koma frá innviðaráðuneyti, menningar- og viðskiptaráðuneyti og umhverfis-, orku og loftslagsráðuneyti.
Undir Sóknaráætlun er annars vegar Uppbyggingarsjóður Vestfjarða og hins vegar Áhersluverkefni sem skilgreind eru til allt að þriggja ára í senn.
Við gerð Sóknaráætlunar Vestfjarða voru haldnir fjórir opnir íbúafundir, haldið ungmennaþing og sendir út spurningalistar og má áætla að um 450 manns hafi lagt sitt af mörkum við mótun áætlunarinnar.
