Undanfarna daga hefur verið slátrað úr kvíum Arctic Fish við Haukadalsbót í Dýrafirði.
Í færslu á Facebooksíðu fyrirtækisins segir að vel hafi gengið og að fiskurinn sé fallegur og af góðum gæðum.
Aflanum er komið til vinnslu í Bolungarvík með brunnskipinu Nova Trans.
Að lokinni löndun um hádegi siglir Nova Trans til Dýrafjarðar og byrjar að sækja nýjan skammt fyrir næsta dag, um 80 til 110 tonn af laxi hvert skipti.
„Þegar þeir koma þangað er starfsfólk okkar í Dýrafirði búið að gera klárt fyrir afhendingu. Það er gert þannig að nótinni er lyft og kastnót er sett út sem þrengir að fiskinum upp að brunnbátinum sem sýgur hann um borð lifandi. Þaðan er svo siglt í Bolungarvík þar sem að slátrun hefst í morgunsárið,“ segir í færslunni.
Það tekur alla jafna um sex til tíu vinnsludaga að klára úr hverri kví en um tíu kvíar eru á hverju eldissvæði.
