Í fréttabréfi Cruise Iceland, samtaka fyrirtækja og hafna sem þjónusta skemmtiferðaskip, kemur fram að tímabilið gekk vel á Ísafirði, bæði hvað varðar skipulag og þjónustu. Sambúð hjá ferðaþjónustuaðilum á
bryggjunni komst í fínar skorður og hélst ljómandi góð í sumar. Um 10 komum var aflýst vegna veðurs sem eru ekki mikil afföll hlutfallslega miðað við að það áttu að vera rúmlega 170 komur en voru rúmlega 160.
Nefnt er sem dæmi að Litlibær í Skötufirði fái rúman þriðjung sinna gesta af skemmtiferðaskipum og að 85% viðskiptavina í hvalaskoðun hjá Vesturferðum komi af skemmtiferðaskipum. Vakin er athygli á aukna umferð á Sauðfjársetrið á Ströndum sem er vegna farþega af skemmtiferðaskipum.
Óþarfa áhyggjur
Þá segir í fréttabréfinu að áhyggjur sem uppi voru í einstökum fjölmiðlum um of mikinn fjölda af ferðamönnum á einstökum dögum hafi reynst óþarfar.
„Á stærstu tveimur dögunum voru þó yfir 7000 manns á svæðinu en gott skipulag gegndi lykilhlutverki í að allt gengi smurt fyrir sig. Meðal annars voru fleiri verslanir með opið á sunnudögum vegna skipakomanna. Þótt helgarnar séu oft yfirsetnar yfir sumarið eru fáir skipalausir dagar í bænum og þeir ná yfirleitt ekki nema kannski fjórum á mánuði þegar tímabilið stendur sem hæst. Í bæði júlí og ágúst eru yfir 50 komur yfir mánuðinn, eða 56 í ágúst og svipað í júlí. Einn daginn fór tala skipa meira að segja upp í fimm yfir einn dag. Reyndar var um minni skip að ræða og einungis rúmlega 3000 manns, en það náðist að koma alveg fjórum að bryggju sem er gott afrek. Stefnan er sú að halda fjölda skipagesta í skefjum og að næsta sumar fari þeir ekki yfir sjö þúsund þegar mest er, en æskilegur fjöldi þó kannski nær fimm þúsund.“
loftmengun undir mörkum
Vikið er að loftmngun skemmtiferðaskipa og segir að „oftar en ekki er um gufu að ræða, sem er hvít á litinn þó það séu vissulega einhver skip sem koma sem eru ekki nægjanlega hrein. Ísafjarðarhöfn er með samning við EPI og fær skýrslu mánaðarlega og er höfnin vel undir öllum mörkum á mengunarmælum.“
Miklar framkvæmdir hafa verið á Ísafirði til þess að byggja upp aðstöðu fyrir skemmtiferðaskipin og farþega þeirra. Kostnaðurinn við stækkun Sundahafnar er um 1.400 m.kr. Um er að ræða langan viðlegukant, nýtt, malbikað bílaplan í framkvæmd fyrir rútur og bíla við hafnarkantinn sem áætlað er að verði tilbúið næsta sumar. Á döfinni er einnig að byrja að byggja móttökuhús á næsta ári, sem mun vera við nýju bílastæðin. Þar verður búið til torg þar sem hægt verður að vera með sölubása.
áhyggjur af innviðagjaldi
Fram kemur í fréttabréfinu að áhyggjur eru af afleiingum þess að leggja á um áramótin nýtt innviðagjald á farþega skemmtiferðaskipa. Leggjst gjaldið á þegar seldar ferðir og verða skipafélögin að greiða það til ríkisins. Hefur það þegar leitt til töluverðra afbókana á komum á komandi sumri að því er fram kemur í fréttabréfinu.
„Útgerðir skipanna hafa þó fyrst og fremst lagst gegn því að gjaldtakan sé ekki fyrirsjáanleg þótt upphæðin sé vissulega mjög há, margfaldur gistináttaskattur til að mynda. Íþyngjandi breytingar með svo skömmum fyrirvara hafa mjög fælandi áhrif á erlenda aðila, þar sem þeir geta ekki velt auknum kostnaði yfir á farþega sem hafa þegar greitt fyrir ferðir sínar og ekki síður vegna þess að svona slæm stjórnsýsla vekur umtal víða um heim sem er skaðlegt Íslandi.“
