Þakka ber það sem vel er gert. Í aðdraganda kosninga sá fjárlaganefnd að ekki yrði lengur hægt að fresta tveimur lykilframkvæmdum í vegakerfinu á Vestfjörðum. Þriðji áfangi vegar yfir Dynjandisheiði og bygging tveggja brúa í Gufudalssveit hefur fengið fjárveitingu. Nú vonum við að veglagningu yfir Dynjandisheiði ljúki á næsta ári og að nýjar brýr í Gufudalssveit verði tilbúnar í árslok 2026.
Síðustu misseri hafa orðið þáttaskil í samgöngum milli norðanverðs Djúps og annarra landshluta. Þungi ferða hefur flust úr Djúpinu á svokallaða vesturleið. Stærstu þrír þættirnir í því eru Dýrafjarðargöng, vegbætur á Dynjandisheiði og þverun Þorskafjarðar auk tengdra framkvæmda. Þær tvær framkvæmdir sem settur var peningur í eru lokahnykkurinn í tveimur síðarnefndu verkefnunum.
Namm, marsipan!
Þegar þessu lýkur þarf að klippa á borða og baka stórar marsipantertur með jarðarberjafrómas og súkkulaðiskreytingu ofaná. Og ekki misskilja mig: það verða bæði margar marsipantertur og að minnsta kosti þrjár athafnir. Fyrst á áningarstaðnum fyrir ofan Geirþjófsfjörð (til vara niðri við Dynjanda, af því að þar er aðgengi að klósettum) til að fagna áfangasigrinum á Dynsunni.
Svo verður aftur veisla, í þetta skiptið á Grónesi, nesinu milli Gufufjarðar og Djúpafjarðar. Grónes verður í alfaraleið þegar firðirnir sitthvoru megin verða þveraðir og væntanlega jafntamt í munni Vestfirðinga og fjarðanöfnin í Djúpinu og nöfn handboltahetjanna í silfurliðinu 2008.
Seinnipart 2026, getum við svo haldið fjar-marsipantertuveislu á öllum þjóðvegum Vestfjarða, því samkvæmt samningum á þá að ljúka uppsetningu 23 sendimastra fyrir farsímanet víða á kjálkanum. Ekki verður lengur slitrótt samband á vegum, sem bæði auðveldar manni að nýta tímann til að hringja símtöl, en eykur einnig öryggi veganna.
Önnur góð frétt í fjárlögum er hin svokallaða halaklipping vetrarþjónustu, en þar var uppsafnaður halli Vegagerðarinnar vegna snjómoksturs gerður upp. Vonandi losnar við það spenna sem verið hefur á fjárheimildum þeirra og við getum séð fram á lengri opnunartíma vega.
Og hvað svo? Trostansleggur Dynjandisheiðarinnar er sennilega efstur á blaði af einstökum framkvæmdum, sem og samgöngubætur í tengslum við virkjanaframkvæmdir í Árneshreppi. Samhliða halda jarðgangarannsóknir áfram og viðgerðir á köflum sem hafa látið mikið á sjá.
Innviðafélag Vestfjarða hefur náð að setja þessi mál öll á dagskrá með það að markmiði að fá samgöngusáttmála fyrir Vestfirði inn í stjórnarsáttmála nýrrar ríkisstjórnar. Það væri stóráfangi.
Gylfi Ólafsson, formaður stjórnar Fjórðungssambands Vestfirðinga
