Áætlað er að losun gróðurhúsalofttegunda frá hagkerfi Íslands hafi verið 5.065 kílótonn CO2-ígilda á fyrstu þremur ársfjórðungum 2024 að því er kemur fram í grein á Hagstofu Íslands.
Losun gróðurhúsalofttegunda hefur því dregist saman um 4% ef miðað er við sama tímabil fyrra árs. Hins vegar sé miðað er við sama tímabil ársins 2022 hefur losun aukist um 8%.
Tæplega 92% af losun frá hagkerfinu mátti rekja til atvinnugreina en þar vó þyngst losun tengd framleiðslu málma (26% af heildarlosun) og flugsamgöngum (25%). Losun frá fiskveiðum og fiskeldi nam um 7,7% af heildarlosun, litlu minna en losun frá heimilum landsins sem var um 8,2% af heildinni. Losun frá heimilum var nær eingöngu vegna aksturs heimilisbíla.
Þessar niðurstöður koma fram í bráðabirgðaútreikningum á losun gróðurhúsalofttegunda frá hagkerfi Íslands. Losun frá hagkerfi Íslands er frábrugðin losunarbókhaldi Íslands sem Umhverfisstofnun sendir til loftslagsráðs Sameinuðu Þjóðanna. Í því bókhaldi er eingöngu litið á losun sem á sér stað innan landamæra Íslands en útmörk hagkerfisins eru önnur.
Bráðabirgðatölurnar eru fengnar úr yfirgripsmikilli greiningu á mörgum þáttum sem hafa bein eða óbein áhrif á losun, þar á meðal gögnum um utanríkisverslun og tölfræði um rekstur fyrirtækja, vinnumarkað, samgöngutölur og mannfjölda.
Þessar tölur eru settar í samhengi við sögulegt losunarmynstur til að búa til mánaðarlegt og árlegt mat.
