Edda Bára Árnadóttir hefur verið ráðin sem verkefnastjóri Bláma á Patreksfirði en Blámi er samstarfsverkefnis Landsvirkjunar, Orkubús Vestfjarða, Vestfjarðarstofu og Umhverfis-, orku- og loftlagsráðuneytisins.
Edda Bára hefur frá árinu 2018 starfað sem sérfræðingur hjá KPMG þar sem verkefni hennar voru einna helst á sviði virðisaukaskatts, aðgerða gegn peningaþvætti og félagaréttar. Hún er með BSc- og ML-gráðu í viðskiptalögfræði frá Háskólanum á Bifröst. Edda Bára er gift Hilmari Blöndal og eiga þau saman tvær stelpur þær Aríu Rós og Aþenu Gestrúnu.
„Ég hlakka mikið til að koma aftur heim eftir 13 ára fjarveru og geta lagt mitt af mörkum til samfélagsins. Ég hef mikla trú á Vestfjörðum og það er gaman að sjá hvernig atvinnulíf á svæðinu hefur breyst síðustu ár meðal annars vegna fiskeldis, ferðaþjónustu og vaxtar Kerecis.
Það eru mikil tækifæri sem felast í tækniþróun og nýsköpun á sviði orkumála og matvælaframleiðslu og er mjög spennandi að fá að taka þátt í slíkum verkefnum í samstarfi við vestfirsk fyrirtæki og samfélagið og styðja þannig við áframhaldandi vöxt þeirra í gegnum græna orku, öfluga innviði og samvinnu„ segir Edda Bára.
„Það er mikill fengur í að fá Eddu Báru til liðs við okkur hjá Bláma og þekking hennar og reynsla mun hjálpa okkur að raungera fleiri og stærri verkefni“ segir Þorsteinn Másson, framkvæmdastjóri Bláma.
