Lögreglan á Vestfjörðum greindi frá því fyrir stundu að hún hafi fengið tilkynningu um að hvítabjörn hafi gengið á land á Höfðaströnd í Jökulfjörðum.
Lögreglan á Vestfjörðum hefur, að höfðu samráði við Umhverfisstofnun, kallað út þyrlu LHG ásamt því að björgunarbáturinn Kobbi Láka er nú þegar farinn af stað með tvo lögreglumenn frá Ísafirði.
Ætlunin er að tryggja öryggi þess fólks sem kann að vera á svæðinu.
Fólk sem er á svæðinu er hvatt til þess að halda sig innandyra og hafa varann á sér þar til lögreglan gefur út frekari tilkynningar.
