Niðurstöður talninga á útsel við Ísland haustið 2022 liggja nú fyrir.
Stærð íslenska útselsstofnsins hefur verið metin reglulega frá 1982 með talningum á kópum að hausti. Í talningunni árið 2022 var heildarkópaframleiðslan metin vera 1551 kópar.
Mikilvægasta kæpingarsvæðið var líkt og áður Breiðafjörður með um 62% af kópunum.
Út frá þessari kópatalningu er stofnstærð útsels árið 2022 metin 6697 dýr. Það þýðir um 27% fækkun í stofninum frá fyrstu talningu sem fór fram árið 1982, en jafnframt um 6,8% fjölgun frá árinu 2017 þegar talning fór síðast fram.
Breytingin á stofnstærð milli áranna 2005 og 2022 var þó ekki tölfræðilega marktæk sem þýðir að stærð stofnsins stendur í stað.
