Aðalfundur Félags skógarbænda á Vestfjörðum var haldinn á handverksmarkaði Össu Króksfjarðarnesi laugardaginn 29. júní 2024. Mættir voru 13 félagar. Naomi Bos formaður fór yfir starfið á árinu. Breytingar urðu á stjórn frá fyrra ári þannig að í stað Naomi og Mörtu Guðrúnar Jóhannesdóttur í aðalstjórn voru kjörin þau Lilja Magnúsdóttir og Dagbjartur Bjarnason.
Stjórnin skipti með sér störfum á þá leið að Lilja Magnúsdóttir er formaður, Arnlín Óladóttir er gjaldkeri og Dagbjartur Bjarnason ritari. Auk hefðbundinna aðalfundarstarfa var rætt um fyrirhugað málþing á Laugum í Sælingsdal þann 12. október í haust og drög að dagskrá sem lágu fyrir fundinum. Áhugi er fyrir því að fá formenn og stjórnir annarra skógarbændafélaga til skrafs og ráðagerðar um að sameina krafta skógarbænda og ræða sameiginlega framtíðarsýn. Var nýrri stjórn falið að vinna þessar hugmyndir áfram og mun nýkjörin stjórn skógarbænda á Vestfjörðum setja sig í samband við kollega sína í öðrum landshlutum til að fá þá í lið með sér við þessa umræðu.
Mikill áhugi var fyrir málþinginu í haust og mun ný stjórn vinna áfram með drög að dagskránni og koma henni á framfæri sem allra fyrst.
Eftir fund var gengið um Skóga í Þorskafirði undir handleiðslu Halldórs Þorgeirssonar og Eyglóar Gísladóttur ásamt Arnlín Óladóttur sem sögðu frá þessum fallega og sérstaka skógi. Jörðin Skógar eru í eigu Bahá‘í samfélagsins á Íslandi og hefur mikil vinna verið lögð þar í gróðursetningu og fegrun umhverfisins með stígagerð og auðveldara aðgengi.
Stjórn Skógarbænda á Vestfjörðum skipa nú Lilja Magnúsdóttir, formaður, skógarbóndi í Tálknafirði, Dagbjartur Bjarnason, ritari, skógarbóndi í Dýrafirði og Arnlín Óladóttir, gjaldkeri, skógarbóndi í Bjarnarfirði á Ströndum.
