Vörður II var kallaður út snemma í morgun, rétt upp úr klukkan 6, vegna lítils fiskibáts sem var í vélar vandræðum. Báturinn var þá staddur um fimm sjómílur norður af Bjargtöngum. Vörður II var farinn út frá Patreksfirði klukkan 6:20 og hélt áleiðis að bátnum. Fimmtán mínútur í átta í morgun var svo taug komin frá Verði II í bátinn og haldið til Patreksfjarðar. Hæg norðan gola var á staðnum en þokuslæðingur. Rétt fyrir klukkan 11 í morgun kom Vörður svo með bátinn til hafnar á Patreksfirði.
Upp úr hálf ellefu í morgun var svo áhöfnin á Björgunarskipinu Björgu á Rifi kölluð út vegna lítils fiskibáts sem var þá staddur undan Rauðasandi með bilað stýri. Bátinn rak hægt undan norðanáttinni en annars var engin hætta á ferðum.
Björg var komin á staðinn rétt um 14 í dag, eftir siglingu yfir allan Breiðafjörð. Taug var komið á milli og er Björg nú með bátinn í togi og er stefnan sett á Grundarfjörð þaðan sem fiskibáturinn er gerður út. Áhöfnin á Björgu gerði ráð fyrir að vera komin til hafnar í Grundarfirði um 7 leitið í kvöld.
