Dagskrá tónlistarhátíðarinnar Við Djúpið á Ísafirði er tilbúin. Hátíðin hefst mánudaginn 17. júní með opnunartónleikum í Hömrum og lýkur föstudagskvöldið 21. júní með tónleikum bæði á Dokkunni og í Hömrum.
Líklega má telja hápunktinn verða fimmtudaginn 20. júní með flutningi á Vetrarferð Franz Schuberts.
Í kynningu segir að verkið sé án efa hornsteinn í tónbókmenntunum og sjálfsagt frægasti söngvasveigur allra tíma. Inntak verksins – ljóðanna og tónlistarinnar –, flakk, löngun, missir og hið óþekkta varð Thomas Posth og Fynn Großmann innblástur til að skrifa nýa hljómsveitarútsetningu á verkinu fyrir þýsku kammersveitina Orchester im Treppenhaus.
Á tónleikunum frumflytur þýska kammersveitin Orchester im Treppenhaus undir stjórn Thomas Posth Vetrarferðina í þessari nýju útsetningu á Íslandi. Það kemur í hlut Ísfirðingsins Herdísar Önnu Jónasdóttur, sópran, að tjá hlutverk förumannsins en þó er brugðið á það ráð að þeim hluta er lýsa hinum ást förusveinsins með beinum hætti til konu er skipt út fyrir hljómsveitarparta eða þýðingu á önnur tungumál eins og arabísku og japönsku sem breyta sjónarhorni verksins lítið eitt. Útsetningin er fyrir 11 manna hljómsveit; strengi, bassaklarínett, rafmagnsgítar, harmoniku, sög og slagverk svo eitthvað sé nefnt.
