Nýr bátur í útgerð Odda hf. á Patreksfirði, sem fær nafnið Núpur BA 69, kom til heimahafnar á laugardag.
„Við setjum bátinn í okkar liti og merkjum upp á nýtt strax þegar veður leyfir,“ sagði Skjöldur Pálmason framkvæmdastjóri Odda í samtali við Morgunblaðið.
Núpur er tæplega 690 brúttótonn, 43,2 metra langur og smíðaður í Noregi árið 1992. Báturinn er sérbúinn til veiða á línu.
Eldra skipið með sama nafni sem var smíðað árið 1976 í Póllandi og er 237 rúmlestir að stærð fer nú á söluskrá.
