F. 14. júní 1934 – D. 23. nóv. 2023.
Jarðsunginn frá Glerárkirkju 4. desember 2023.
Hinn 24. febrúar árið 1945 fórst Es Dettifoss, skip Eimskipafélags Íslands, í hafi. Það var að koma frá New York í Bandaríkjunum á leið til heimahafnar. Var skipið á siglingu skammt norður af Írlandi í lítilli lest frá Belfast til Skotlands þar sem ætlunin var að taka saman við stærri flota er sigla skyldi heim til Íslands. Kafbátur mun hafa skotið á skipið og var Dettifoss sokkinn á sjö mínútum. Um borð voru 14 farþegar og 31 skipverji. 30 manns björguðust en 15 fórust.
Tveir afkomendur Boga bónda og kaupmanns í Búðardal Sigurðssonar frá Sæunnarstöðum í Hallárdal í Vindhælishreppi, voru í skipshöfninni. Fórst annar þeirra, brytinn á Dettifossi, Jón Sigurður Karl Kristján, sonur Boga og eiginkonu hans, Ragnheiðar Sigurðardóttur Johnsen frá Flatey á Breiðafirði. Jón lærði matreiðslu á Hótel d´Angleterre í Kaupmannahöfn. En meðal þeirra skipsmanna sem björguðust var dóttursonur Boga, Bogi Þorsteinsson loftskeytamaður síðar yfirflugumferðarstjóri á Keflavíkurflugvelli. Hann var sonur Þorsteins bónda í Ljárskógaseli Gíslasonar og Alvildu Maríu Friðriku Bogadóttur sem Bogi eignaðist fyrir hjónaband. Móðir Alvildu var Sigríður Guðmundsdóttir frá Kollugerði í Vindhælishreppi síðar húsfreyja á Kornsá í Undirfellssókn í Austur-Húnavatnssýslu. Alvilda átti fyrr Rögnvald Magnússon á Neðri-Brunná í Saurbæ og við honum soninn Magnús Skóg Rögnvaldsson vegaverkstjóra í Búðardal og bóksala.
Fráafi Boga í Búðardal var Sigurður Þorsteinsson bóndi á Reykjavöllum á Neðribyggð í Skagafirði. Hann varð úti á Kili ásamt Reynistaðarbræðrum árið 1780. Langafi Ragnheiðar konu Boga var Bogi stúdent og fræðimaður Benediktsson á Staðarfelli höfundur Sýslumannaæva. Seinni kona Boga var Ingibjörg Sigurðardóttir kennslukona frá Kjalarlandi í Vindhælishreppi. Þau Bogi voru systrabörn.
Faðir Ólafs Þ. Jónssonar var Jón bryti Bogason, móðir hans Anna Sigurrós Levoríusardóttir frá Skálum á Langanesi en kjörmóðir Ólafs var Þórdís Finnsdóttir skipstjóra á Akureyri fyrri eiginkona Jóns Bogasonar. Hún lést árið 1939 fertug að aldri. Gekk Jón síðar að eiga Friðmeyju Ósk Pétursdóttur sjómanns Sigurðssonar á Vesturgötu 51 í Reykjavík og gekk hún Ólafi í móðurstað.
Drengur undi Ólafur, sem þá var kallaður Onni, langdvölum hjá föðursystur sinni Ragnheiði Bogadóttur frá Búðardal og eiginmanni hennar Gunnari Ólafssyni húsgagnasmíðameistara og bifreiðarstjóra næturlækna í Reykjavík. Stundum og lengstum á Frakkastíg 6a í Reykjavík en hríðum í sumarbústaðnum góða (Stóra-Klöpp núna) við Hólmsárbrú.
Til er ljósmynd sem tekin hefur verið undir suðurhlið bústaðarins í sólskini. Á henni sést Onni litli, bráðlaglegur, klæddur dökkum jakka. Aðrir sem borin verða kennsl á eru hjónin Gunnar og Ragnheiður og tvær dætur þeirra þær Jóhanna og Ingibjörg.
Ólafur var stórvel gefinn, víðlesinn, róttækur mjög í viðhorfi sínu til þjóðfélagsmála og ritfær í besta lagi. Ekki var amalegt að hlusta á hann fjalla um Skafta Þóroddsson lögmann í “Nýjustu fréttum af Njálu” sem endurfluttar voru í Ríkisútvarpinu 4. nóvember síðastliðinn í umsjá Einars Karls Haraldssonar.
Guð blessi minningu drengsins góða Ólafs Þ. Jónssonar. Guð verndi, huggi og styrki ástvini hans alla.
Gunnar Björnsson, pastor emeritus.
