Föstudaginn 26. ágúst kl. 16 verður opnuð sýning á verkum Hildar Elísu Jónsdóttur í Úthverfu á Ísafirði. Sýningin ber heitið Seeking Solace og stendur til sunnudagsins 17. september. Listakonan verður viðstödd opnun sýningarinnar.
„Veistu, allt í einu, finnst mér lífið ekki bara vera gilligilli hlæhlæ lengur, heldur finnst mér það vera orðið frekar, frekar alvarlegt. Ég þarf að gera hluti við líf mitt en það er svo ógnvekjandi, ég er bara lítið barn – lítil og kvíðin, hrædd og áhyggjufull.“
Í Seeking Solace er skyggnst inn í andstæða heima faglegs ytra byrðis atvinnulífsins og innri átök
nútímafólks. Í gegnum verkið deila starfsmenn á skrifstofu djúp-persónulegum obinberunum, sungnum við gömul íslensk þjóðlög, einlæg og innileg augnablik sem hægt er að rekja djúpt í iður flytjandans; galli í yfirvegaðri og faglegri frammistöðu þeirra. Þegar örlítið truflaðar og ofurmannlegar játningarnar eru tvinnaðar saman við forneskjuleg en tignarleg þjóðlögin verður svikaraheilkennið í textunum enn meira áberandi. Á sama tíma og textarnir eru djúpmannlegir og óvægnir eru þjóðlögin traustvekjandi og huggandi – þverstæða sem margir tengja við úr eigin lífi í sambandi við innri orðræðu í andstæðu við ytri aðstæður.
Hildur Elísa Jónsdóttir (1993) er myndlistarmaður og tónskáld búsett í Amsterdam og Reykjavík. Hún hefur áhuga á frásagnarhefðum og því að skapa alltumlykjandi upplifanir í rými, sem oft sækja innblástur í hversdagslega hluti og uppákomur. Sköpunarferli hennar er limbó duttlungafullra hugdetta og áráttukenndra rannókna en í verkum sínum fæst hún við hversdagslegar upplifanir og eðlilegt hegðanamynstur á gagnrýninn hátt. Með því að setja þessa hversdagslegu atburði í óhefðbundið og óvenjulegt samhengi ögrar hún skilningi okkar á fastmótuðum og manngerðum félagslegum raunveruleika okkar og sýna fram á ótrúlega getu mannsins til þess að skapa annarskonar merkingu og nýjan raunveruleika – með ‘afhverju’ og ‘hvað ef’ að vopni.
