![pilan_IMG_0872](https://www.bb.is/wp-content/uploads/2023/02/pilan_IMG_0872-696x464.jpg)
Skotíþróttafélag Ísafjarðar opnaði á laugardaginn nýja og veglega aðstöðu fyrir píluíþróttina í aðstöðu félagsins á Torfnesi. Undirbúningur hefur staðið yfir síðan í haust og að sögn Páls Brynjars Pálssonar formanns deildarinnar hefur gengið vel að afla búnaðar og innrétta aðstöðuna sem er undir stúkunni á Torfnesvellinum. Kostnaður er allnokkur eða hátt á aðra milljón króna og segir Páll Brynjar að fengist hafi styrkir til þess að standa undir honum.
Fjölmargir lögðu leið sína á laugardaginn á Torfnesið til þess að skoða aðstöðuna og æfa sig í píluköstum. Mátti sjá ýmsa efnilega kastara munda pílurnar. Opið verður reglulega þrisvar í viku til æfinga og er útlit fyrir að þessi nýja íþrótt á Ísafirði muni njóta töluverðra vinsælda.
![](https://www.bb.is/wp-content/uploads/2023/02/Pilan_b_IMG_0878-1024x683.jpg)