Mikil umsvif eru við Ísafjarðarhöfn þessa dagana vegna slátrunar á 4000 tonnum af eldislaxi úr kvíum í Dýrafirði. Þar sem sláturhúsið á Bíldudal er þegar starfrækt á fullum afköstum og nýja sláturhúsið í Bolungavík er ekki tilbúið var norska vinnsluskipið Norwegian Gannet fengið til landsins. Fiskinum er dælt upp í skipið úr kvíunum og slátrað og síðan landað á Ísafirði og keyrt til pökkunar bæði til Grindavíkur, Djúpavogs, Patreksfjarðar og víðar.
Á sex vikna tímabili er slátrað um 4000 tonnum. Um 16 flutningabílar eru í stöðugum akstri allan sólahringinn, alla daga vikunnar og á annað hundrað manns koma að pökkun á þessum stöðum segir Arctic Fish í frétt um málið.
Allmörg fyrirtæki koma að þessu svo sem Vísir hf, Búlandstindur ehf, Oddi hf, Glanni, Seborn, Havline, Ísinn, Pescatech,
Tempra, Sjótækni, Baader og Skaginn 3x.
