Finnst við hæfi að vera með tvær smárétta uppskriftir hérna svona fyrir kosningavökuna og auðvitað Eurovision.
En hérna kemur uppskriftin af laxasnittum á ananas eða snittubrauði. Mér finnst þetta mjög góður réttur.
Laxasnittur
Uppskrift, gefur ca. 10-14 bita
100 g laxaflak (endilega frá Vestfirskum framleiðendum)
1 stk. hvítlauksgeiri
2msk Maldon sjávarsalt
Hluti úr ferskum ananas
2-3 msk. sýrður rjómi
1stk skarlottulaukur
Ferskur pipar úr millu
2 msk. ólífuolía
½ búnt ferskur kóríander
Roð- og beinhreinsið laxflakið og skerið í litla teninga. Afhýðið og pressið hvítlauk, fínt saxið skarlottulaukinn, setjið saman við ólífuolíuna, og blandið við laxa teningana, kryddið með salti og pipar.
Framreiðið ofan á ferskan ananas sem búið er að skera í fallega bita, skreytið með sýrðum rjóma og kóríander laufum. Það er líka mjög gott að framreiða á snittubrauði ef þið kjósið það frekar en ananas.
Fylltir sveppir
Uppskrift (ca. 16 sveppir):
500 g sveppir (gott að velja meðalstóra sveppi, alla svipað stóra)
1.5 msk olía (extra virgin finnst mér best)
4 -5 hvítlauksrif, saxaður mjög fínt eða pressaður
1 blaðlaukur, hvíti hlutinn saxaður mjög smátt
Ítölsk hvítlauksblanda frá pottagöldrum (eða annað gott hvítlaukskrydd)
1/4-1/2 tsk cayenne pipar
Salt og grófmalaður svartur pipar
1 box (200 g) rjómaostur með kryddjurtum, látið ná stofuhita
Ca. 50 g rifinn Parmesan ostur
Ofn hitaður í 175 gráður og ofnplata klædd bökunarpappír. Sveppir hreinsaðir varlega með eldhúspappír og stönglarnir losaðir úr sveppunum. Sveppastönglarnir eru því næst saxaðir mjög smátt og þeir steiktir á pönnu ásamt hvítlauknum og blaðlauknum upp úr olíunni (þess skal gæta að laukurinn brenni ekki). Þegar sveppirnir hafa tekið lit er pannan er tekin af hellunni og látið kólna dálítið. Þá er rjómaosti, helmingnum af parmesan ostinum og kryddum bætt út í og blandað vel saman, smakkað til og kryddað meira eftir smekk. Sveppahöttunum er raðað á ofnplötuna. Hver sveppur er því næst fylltur vel að sveppa/ostablöndunni. Að lokum er afgangnum af rifna parmesan ostinum dreift yfir sveppina. Bakað í ofni við 175 gráður í um það bil 20 mínútur eða þar til sveppirnir byrja að mynda vökva og osturinn hefur brúnast.
Verði ykkur að góðu!
