Stofnvísitala þorsks samkvæmt haustmælingu hefur lækkað töluvert frá árinu 2017 þegar hún mældist sú hæsta frá upphafi haustmælingarinnar og er nú svipuð því sem hún var árin 2008-2009.
Lægri vísitala í ár stafar af því að minna fékkst af 35-75 cm þorski. Stofnvísitala ýsu hefur farið hækkandi frá 2017 en vísitala ufsa hefur farið lækkandi frá árinu 2018.
Fæða þorsks var fjölbreytt en magn loðnu, rækju og ísrækju í mögum þorsks hefur minnkað á síðari árum. Á haustin eru ýmis botndýr algengasta fæða ýsu en meira var nú af síli í mögum ýsu en sést hefur frá árinu 2007.
Þetta kemur fram í niðurstöðum rannsókna Hafrannsóknastofnunar í stofnmælingum botnfiska að haustlagi en leiðangurinn fór fram dagana 4. október til 3. nóvember 2021. Verkefnið hefur verið framkvæmt með sambærilegum hætti ár hvert frá 1996.
