Árni Magnús Guðmundsson, flugstjóri og flugeftirlitsmaður, fæddist þann 9. ágúst 1916 á Ísafirði.
Foreldrar hans voru Guðmundur Árnason, sjómaður og verkamaður á Ísafirði, f. 20.10. 1883, d. 13.12. 1986, og k.h., Una Magnúsdóttir, verkakona og húsmóðir.
Foreldrar Guðmundar voru Árni Sigurðsson, sjómaður á Hafursstöðum á Skagaströnd, og k.h., Steinunn Guðmundsdóttir, og foreldrar Unu voru Magnús Kristjánsson, sjómaður á Ísafirði, og k.h., Margrét Gunnlaugsdóttir.
Magnús lauk sveinsprófi í rafvirkjun frá Iðnskóla Akureyrar 1938 og atvinnuflugmannsprófi frá Flugskóla Konna Jóhannessonar í Winnipeg í Manitoba í Kanada 1943. Hann öðlaðist bandarísk flugstjóraréttindi að loknu námskeiði hjá Pan American í New York í Bandaríkjunum 1952.
Magnús starfaði sem rafvirki árin 1938-1942. Hann var flugstjóri hjá Flugfélagi Íslands hf. 1945-1947 og hjá Loftleiðum hf. 1947-1973. Þá starfaði hann sem flugstjóri hjá Flugleiðum hf. frá 1973, þar til hann lét af störfum sökum aldurs 1979. Hann hafði flugskírteini númer 9.
Magnús rak flugskólann Cumulus ásamt Smára Karlssyni og Önfirðingnum Jóhannesi Snorrasyni 1948-1950.
Magnús var flugstjóri á Douglas Skymaster DC-4-vélinni Geysi, sem týndist á Bárðarbungu í Vatnajökli í september 1950. Sex dagar liðu áður en björgunarsveit komst á staðinn til að bjarga áhöfninni sem komst öll lífs af.
Magnús starfaði sem flugeftirlitsmaður hjá Flugmálastjórn 1979-1986.
Eiginkona Magnúsar var Agnete Simson ljósmyndari, f. 9. september 1923, – d. 23. janúar 2018.
Foreldrar hennar voru Martinus K.P. Simson, ljósmyndari -skógræktarfrömuður á Ísafirði og fjölleikalistamaður, f. á Jótlandi í Danmörku, og Guðný V. Gísladóttir.
Agnete var alin upp á Ísafirði og lærði þar ljósmyndun í iðnskólanum og hjá föður sínum. Um tvítugt flutti hún til Reykjavíkur og fór að vinna á ljósmyndastofu Sigurðar Guðmundssonar. Eftir að þau Magnús hófu búskap í Reykjavík var hún að mestu heimavinnandi en vann nokkur ár á ljósmyndastofu og tók að sér verkefni sem hún vann heima, s.s. að lita myndir og „retouchera“ plötur. Hún var einnig árum saman sjálfboðaliði Rauða krossins á Landspítalanum við að sjá um utanumhald og útlán bóka til rúmliggjandi sjúklinga.
Magnús og Agnete eignuðust þrjú börn:
Guðnýju, Guðmund og Unu,
en fyrir hjónaband átti Magnús soninn Braga.
Magnús Guðmundsson lést þann 27. apríl 2014.
 |
.. Úr Morgunblaðinu 8. apríl 1982 þar sem mjög ítarlegt viðtal var við Magnús Guðmundsson. Skráð af Menningar-Bakki. |
