Guðmundur M. Kristjánsson yfirhafnarvörður Ísafjarðarhafna segir að endurbókanir séu hafnar hjá skipafélögunum. Miðað við þær á hann von á því að rólegt verði fram í miðjan júlí í sumar en þaðan í frá fram i september verði skipakomur a.m.k. annan hvern dag.
„Það er mín tilfinning að það verði allt að 50 – 60 skip sem koma vestur í sumar“ segir Guðmundur.
Að sögn Guðmundar eru 2 – 3 skipafélög að skipulega farþegasiglingar um Ísland í sumar. Fyrirkomulagið sem er í undirbúningi af þeirra hálfu er að fljúga bólusettum farþegum til landsins þar sem þeir fari um borð í skipið. Áhafnirnar verði komnar áður og búnar að fara í sóttkví.
Að öllu virtu er Guðmundur M. Kristjánsson nokkuð bjartsýnn á að úr rætist með skipakomur í sumar þótt þær verði nokkuð fjarri því sem var fyrir covid19.
![](https://www.bb.is/wp-content/uploads/2021/04/Muggi_a.jpg)