Guðríður Hlín Helgudóttir hefur verið ráðin forstöðumaður Muggsstofu á Bíldudal og menninga- og ferðamálafulltrúi Vesturbyggðar.
Guðríður var metin hæfust til starfsins úr hópi umsækjenda um starfið, sem auglýst var í desember sl.
Guðríður er ferðamálafræðingur að mennt og stundar nám í Forystu og stjórnun með áherslu á mannauðsstjórnun við Háskólann á Bifröst.
Guðríður starfaði áður sem rekstrarstjóri Hlemmur Square og verkefnastjóri við Selasetur Íslands.
Einnig stofnaði hún ferðaskrifstofuna Seal Travel.
Guðríður hefur einnig komið að ýmsum verkefnum s.s. samstarfsverkefnum upplýsingamiðstöðva á Norðurlandi Vestra, útgáfu smáforritsins „Visit Húnaþing“ og útgáfu barnakorts Norðurlands Vestra. Þá hefur Guðríður sinnt mörgum félags- og trúnaðarstöfum.
Muggsstofa er samfélags- og nýsköpunarmiðstöð á Bíldudal og er miðstöðin samstarfsverkefni Vesturbyggðar og áhugamannafélags um Skrímslasetur á Bíldudal.
Í Muggsstofu verður veitt fjölbreytt þjónusta og aðstaða til sköpunar og frumkvöðlastarfs. Þar verður opinber þjónusta aðgengileg og stuðlað verður að eflingu menningar- og félagsstarfs sem og auka þekkingu og styrkja ímynd Bíldudals.
Í miðstöðinni fer fram starfsemi bókasafnsins og félagsstarf aldraðra, en lögð er rík áhersla á að efla félagstarf aldraðra, með fjölgun viðburða, námskeiða og fl.
