Í dag bárust þær fréttir að Samherjafrændurnir hefðu afsalað eignarhlut sínum að mestu til barna sinna og kölluðu það í fréttatilkynningu kynslóðaskipti. Þeir sitja þó áfram við stjórnvölinn.
Indriði á Skjaldfönn er upptekinn sem aldrei fyrr við sauðburð en skaut þó fram um kvöldmatarleytið þessari vísu:
ÞAÐ Á AÐ GEFA BÖRNUM BRAUÐ.
Bananalýðveldið verst ekki í vök.
Vígreifir sægreifar herða sín tök.
Samherjabörnin fátæku fá
fimmtíu milljarða pöbbunum hjá.
Pétur Bjarnason fyrrverandi fræðslustjóri á Vestfjörðum og Bílddælingur er góður hagyrðingur og hann bætti í vísnasafnið um Samherjakvótann:
Samherjar gefa börnum brauð
sem borgað er með kvótunum.
„Safna auð með augun rauð“
áfram á sömu nótunum.
