Styrktarsamningur milli Ísafjarðarbæjar og Menntaskólans á Ísafirði vegna afreksbrautar við skólann var undirritaður á dögunum en samningurinn er til eins árs. Í samningnum er kveðið á um að framlag MÍ sé að skipuleggja starfsemi afreksíþróttasviðsins, semja við þjálfara um þjálfun í sínum greinum, Sjúkraþjálfun Vestfjarða um þrekæfingar og að leggja til kennara og húsnæði. Þá er rekstrarkostnaður, kynning og utanumhald á höndum menntaskólans. Ísafjarðarbær leggur til 1.911.613 kr. sem eru ætlaðar í launagreiðslur til þjálfara þeirra íþróttagreina sem í boði eru auk þess sem sveitarfélagið leggur til tíma í íþróttahúsinu á Torfnesi sem eru annars ekki í notkun, í samráði við forstöðumenn íþróttamannvirkja.
Það voru þeir Jón Reynir Sigurvinsson, skólameistari Menntakólans á Ísafirði, og Guðmundur Gunnarsson, bæjarstjóri Ísafjarðarbæjar, sem undirrituðu samninginn. Um 40 nemendur skólans stunda nám við afreksbrautina og var hluti þeirra viðstaddur undirritunina. Nemendurnir stunda körfubolta, fótbolta, handbolta, blak og dans.
