Níutíu metrar plús aðra vikuna í röð verður að kallast frábær gangur en í vikunni sem var að líða lengdust göngin um 91,5 m og þar með var 90% markinu náð. Lengd ganga Dýrafjarðarmegin er þá orðin 1.148,3 m sem er rétt tæplega 70% af Dýrafjarðarleggnum og samanlögð lengd ganga nú orðin 4.805,9 m sem er 90,7% af heildarlengd. Lengd að gegnumbroti er nú 495,1 m og eru veðbankar án efa farnir að gæla við gegnumbrotsdagsetningu.
Í vegagerð Dýrafjarðarmegin er unnið við grjótröðun, upphækkun fyllinga, skeringar- og fyllingar, niðursetningu ræsa og eru nú rétt um 200 m kafli eftir þar til vegur frá göngum og vegur að vestan ná saman.
Í göngum Arnarfjarðarmegin er áframhaldið við hreinsun, greftri og fínjöfnun á lagnaskurði auk fleygvinnu fyrir brunnum og fer að styttast í að lagnavinna hefjist.
Meðfylgjandi ljósmyndir sýna ræsalögn, vegfyllingu og grjótvörn Dýrafjarðarmegin auk Nautahjallanámu sem óðum er að taka á sig betri mynd. Þá er ein mynd úr göngum en undir vikulokin var þunnt setlag að læða sér niður úr þekju ganganna.
