Mikil vitundarvakning hefur orðið um mikilvægi þess að draga úr plastnotkun, ekki síst hvað varðar umbúðaplast. Hægt er að draga úr notkun einnota umbúða m.a. með sölu á matvörum án umbúða og með því að neytendur komi með eigin ílát í verslun undir þau matvæli sem ekki eru þegar innpökkuð.
Ef afgreiða á matvæli án umbúða þá þarf að gera það með þeim hætti að matvælaöryggi sé tryggt. Matvælastofnun hefur gefið út leiðbeiningar til verslana og neytenda um matvæli afgreidd í ílát viðskiptavina.
Í leiðbeiningunum eru tekin saman helstu atriði sem verslanir þurfa að huga að. Hver verslun skoðar aðstæður hjá sér, metur hvort hætta getur skapast fyrir þær vörur sem í boði eru. Áður en farið er að bjóða uppá að afgreiða matvæli í ílát viðskiptavina þarf að koma upp verklagi í versluninni sem lágmarkar eða útilokar hugsanlega hættu.
Þá eru neytendum, sem vilja leggja sitt af mörkum við að draga úr notkun einnota umbúða gefin nokkur góð ráð, en þeir bera ábyrgð á öryggi þeirra íláta, sem þeir taka með í verslanir.
