Jón Fanndal Þórðarson. |
Jón Fanndal Þórðarson | 22.04.2005 | 13:38Stöðvið ósómann í fæðingu
Halló, halló Ísfirðingar, innfæddir, aðfluttir, burtfluttir, allir velunnarar Ísafjarðar. Þetta er neyðarkall, um að bregðast við nú þegar, vegna fyrirhugaðrar misþyrmingar á Kubbnum og öllu umhverfi okkar ástdæla bæjar, sem nú er yfirvofandi. Bregðist nú skjótt við og stöðvið ósómann í fæðingu. Það er komið nóg af þessari vitleysu. Þeim sem ekki er kunnugt um hvað er í vændum er bent á að lesa BB sem kom út í gær 20. apríl. Þar má sjá hvað stendur til.Það hefur verið unnið að því öllum árum með ýmsum lagasetningum og fleiru að gera okkur Vestfirðingum ókleift að búa hér. Með tilkomu kvótalaganna er okkur meinað að veiða fisk svo nokkru nemi, lífsbjörgin tekin frá okkur, frystihúsin sem eitt sinn voru glæslegustu fiskvinnsluhús á landinu eru úrelt og hent eins og hverju öðru drasli. Þegar ekki dugði til að flæma okkur í burt að setja á okkur kvótalög og önnur ólög þá er gripið til jarðýtunnar og annarra stórtækra vinnuvéla til að eyðileggja umhverfið. Þá hefur okkur verið hótað, að notað yrði sprengiefni ef allt annað þrýtur. Það á sem sagt að flæma okkur í burt eins og melrakka úr greni. Vestfirðingar eru þrjóskir og hafa ávallt risið upp aftur þó að á móti hafi blásið um skeið. Það munum við líka gera nú og verður tíminn að leiða í ljós hvað þau ár verða mörg. Nú stöndum við frammi fyrir nýrri ógn en það eru reiknilíkanssérfræðingarnir með austurríska tilrauna -líkanið inn á skrifstofu í Reykjavík. Þar eru örlög okkar ráðin, jafnt á þessum sviðum sem öðrum.
Bæjarstjórnin hefur ekki enn látið álit sitt í ljós á þessari framkvæmd en mun væntanlega gera það á næstunni. Ég ætla rétt að vona að þeir fái ekki glýju í augun yfir þessum hálfa milljarði sem framkvæmdin er talin kosta og er kostuð 90% af Ofanflóðasjóði en ef að líkum lætur verður 7-8 hundruð miljónir og er þá stuðst við fyrri reynslu af áætlunum. Ég vona að þeir fórni ekki umhverfinu fyrir þá upphæð. Sagt hefur verið að ekkert borgarhlið sé það þröngt að asni klyfjaður gulli komist ekki inn um það. Vonandi sannast það ekki hér.
Við sem gagnrýnum þessa og þvílíkar framkvæmdir erum jafnan spurð: „Ætlar þú eða þið að bera ábyrgð á fólkinu.“ Ég kasta þessari spurningu til baka. Ætlið þið sérfræðingarnir að gera það og er ykkur treystandi til þess, jafnvel með austurríkst tilrauna -reiknilíkan í höndunum? Ísafjörður er einn af fegurstu bæjum landsins í faðmi fjalla blárra. Umhverfi Ísafjarðar er með því fegursta sem gerist. Ísafjörður er sá staður á landinu sem mér þykir vænst um. Líðum ekki að honum verði fórnað af tilfinningalausum umhverfissóðum.
Jón Fanndal.
Til baka - Prenta grein - Senda grein - Senda á Facebook