Múrinn - Steinþór Heiðarsson | 26.09.2003 | 10:38Málsvarar Saddams ná undirtökum í CIA
„Það getur oft tekið langan tíma að finna hluti“, sagði Halldór Ásgrímsson, utanríkisráðherra, þegar hann var spurður út í leitina að gereyðingarvopnum Íraka í Kastljóssþætti í sumar, rétt eins og hann hefði týnt uppáhaldsvettlingunum sínum í berjamó í fyrra. Spyrlar létu gott heita. Fyrir sex mánuðum hóf 1400 manna lið undir forystu bandarísku leyniþjónustunnar CIA allsherjarleit að gereyðingarvopnum í Írak. Afraksturinn er afskaplega einfaldur eins og fram kemur í skýrslu sem leitarflokkurinn hefur nú skilað til stjórnvalda í London og Washington. Niðurstaðan er sú að engin slík vopn séu til staðar í Írak og ekki hafi fundist neinar rannsóknarstofur þar sem þau gætu hafa verið smíðuð.
Fram kemur í skýrslunni að fullyrðingar um að Íraksstjórn hefði undir höndum „hundruð tonna af efna- og sýklavopnum“ eins og haldið var fram fyrir aðeins einu ári síðan, hafi verið hreinar falsanir. Allir varnaglar hafi kerfisbundið verið strokaðir út úr frumgögnum njósnastofnana og orðalagi hagrætt á ýmsan hátt. Þessar lygar voru pantaðar af ríkisstjórnum George Bush og Tony Blair til að fegra stríð sem var löngu búið að skipuleggja. Stjórnmálamenn beggja vegna Atlantshafsins beittu sömu lygum án afláts í áróðri sínum fyrir árásarstríði gegn Írak. Og sumir gengu miklu lengra í stríðsæsingunum. Björn Bjarnason, núverandi dómsmálaráðherra, var ekki í neinum vafa um það á sínum tíma hvað þeim gengi til sem andæfðu innrásinni í Írak. Björn sagði þá af smekkvísi sinni að Saddam Hussein ætti sér málsvara á Íslandi líka. Væntanlega er Björn enn við það heygarðshornið enda hælir hann sér af því að efast eiginlega aldrei um sínar skoðanir. Það hlýtur að vera hræðileg tilhugsun fyrir mann sem hefur byggt heimsmynd sína svo lengi á óskeikulleika Bandaríkjahers og stjórnmálaarms hans, NATO, að njósnadeildin sé nú orðin yfirfull af málsvörum Saddams Hussein.
Úti í Washington líta ráðamenn málið öðrum augum. Þessi nýja skýrsla frá yfirmönnum leitarflokksins í Írak þykir svo vandræðaleg að tvísýnt er hvort henni verði dreift til þingmanna eins og til stóð. Yfirstríðsherrarnir Blair og Bush munu eflaust áfram hanga á því að Íraksstjórn hafi hugsanlega getað og örugglega viljað smíða gereyðingarvopn. Væntanlega mun aðdáendaklúbbur þeirra á Íslandi taka það sama til bragðs innan tíðar.
Hafi einhvern tíma verið ástæða til að Alþingi setti á fót rannsóknarnefnd þá er það nú. Kjósendur eiga rétt á því að vita hvaða sjónarmið réðu för þegar ríkisstjórnin ákvað að draga Ísland inn í þetta viðbjóðslega stríð með pólitískum og siðferðilegum stuðningsyfirlýsingum. Þegar að minnsta kosti 8-10 þúsund óbreyttir borgarar liggja í valnum í Írak eiga landsmenn ekki að láta segja sér að það geti bara tekið langan tíma að finna hluti.
sh
► Vefritið Múrinn
Til baka - Prenta grein - Senda grein - Senda á Facebook