BB.is

Samþykki var sexý á mýrarboltanum.

bb.is | 19.08.2012 | 10:35Engar tilkynningar af kynferðisbrotum

„Við erum afar ánægðar með gott samtarf og einnig hve öflug gæsla var á mótssvæðinu sem og öryggisgæsla í kringum aðra viðburði í tengslum við hátíðina,“ segir Sólstafakonur en eins og fram hefur komið höfðu forsvarsmenn Mýrarboltafélags Íslands samband við starfskonur Sólstafa Vestfjarða og óskuðu eftir samstarfi við fornvarnarstarf gegn kynferðisofbeldi á Evrópumeistaramótinu í mýrarbolta sem haldið var á Ísafirði um verslunarmannahelgina. „Við urðum af glöðu geði við þeirri ósk,“ segir Harpa Oddbjörnsdóttir.

Engar tilkynningar af brotum hafa borist Sólstafakonum og þær hafa ekki heyrt af tilkynningum til lögreglu um kynferðisbrot í tengslum við hátíðina. „Það er auðvitað mjög ánægjulegt en við verðum samt að hafa í huga að það getur veriðgríðarlega erfitt fyrir brotaþola að tilkynna slík mál og að fjöldi tilkynninga endurspeglar ekki endilega raunveruleikann. Við hvetjum því auðvitað þá einstaklinga sem hafa orðið fyrir einhverju að tilkynna eða leita sér aðstoðar,“ segir Harpa.

Sólstafakonur segia að þær hefði viljað sá örfá atriði framkvæmd betur, en það hafi ekki verið við mýrarboltafélagið að sakast. „Þar ber helst að nefna næturvakt á tjaldsvæðinu í Tungudal, aðeins einn var á vakt og einungis til kl 04:00. Hefðum við viljað sjá fleiri á vakt og þá allan sólarhringinn. Við tókum líka eftir því að fólk var oft eitt á ferli á göngu að kvöldi og nóttu til á milli miðbæjar og tjaldsvæðisins. Þar hefði jafnvel eitthvert rútufyrirtæki á svæðinu getað nælt sér í pening með reglulegum ferðum á milli fyrir sanngjarna upphæð. Þetta tvennt er eitthvað sem mætti huga að fyrir næsta mót,“ segir Harpa. Starfskona Sólstafa var mikið á ferðinni alla helgina og fór töluverður tími í það að keyra fólki á milli staða, sérstaklega ungum konum sem voru einar á ferð á næturnar.

Durex styrkti Sólstafi með því að gefa 1.000 smokka sem dreift var frítt á mýrarboltamótinu, og tóku þátttakendur og áhorfendur vel á móti þeirri gjöf. Límmiðar voru settir á smokkabréfin með sama slagorði og á barmmerkjunum. „Oft sköpuðust skemmtilegar og fræðandi umræður við unga fólkið þegar verið var að selja eða dreifa smokkunum,“ segir Harpa.

Mýrarboltafélagið lét útbúa barmmerki með merki Sólstafa ásamt slagorðinu „Samþykki er sexý“ og seldust merki fyrir um 200 þúsund krónur sem rennur til starfseminnar. Salan fór fram bæði á svæðinu sjálfu en mesta salan var þó á brennunni sem fór fram á hafnarsvæðinu á sunnudagskvöldið.

Þá var einnig hægt að kaupa barmmerkin hjá nokkrum fyrirtækjum í bænum og er enn hægt að nálgast þau þar. Bræðraborg, Kaffi Ísól, Stúdíó Dan og Vestfirska Verslunin eru með merkin til sölu á 1000 kr stk. „Salan er okkar fjármögnun fyrir starfsseminni og fer m.a. í að greiða leigu fyrir afnot af húsnæði sem og að afla okkur meiri þekkingar með því t.d. að sækja námskeið og fyrirlestra tengda málaflokknum en það er mjög mikilvægt fyrir okkur að halda við þekkingu og öðlast nýja,“ segir Harpa.

thelma@bb.is

• Til baka -
• Prenta frétt -
• Senda frétt -
• Senda á Facebook -